× لاتــــ ح تــزم بالــلي ضلوع ـه هشيشه .؟؟ ×

ياراكب اللي يوم تسمـع وشيشـه = وشيش رقطاً ذيلها بالعصاء نيـش
قامت تحـك جنوبهـا مستهيشـة = وتبيـن أنيـابٍ سـوات المناقيـش
يمرج مع البيدا إمـراج الخريشـة = إلى أمرجت بين الوحش والنواحيش
من عقب ماهـي للمنايـا وليشـة = بين الصقور ومبهمـات النواتيـش
حيت حياة اللـي بتالـي الحشيشـة = عقب الدرك شرب القراح النقاريش
جمسٍ يربح كل مـن حـط شيشـة = يتعب بتعبيتـه طـوال الخراطيـش
إلى وقف يكوي الكبـود الغشيشـة = وإلى مشى ما يلحقه مومي الريش
برقٍ من العارض جذبني رعيشـه = يوم يتـلالا بالمـزون المراهيـش
وأثره ما يسقي الكبـود العطيشـة = يبرق ويرعد مير مدري على ويش
لا تحتزم باللي ضلوعـه هشيشـة = اللي ليا سمع النداء صـد تطنيـش
لا تحتزم به لـو تحيـزم بخيشـة = ما يقطع الدِيان ركـض الأكاديـش
وبيتٍ بليا سـاس مثـل العريشـة = يطيح لو لمـع ببويـه و ورنيـش
وجرد السهال الخاليـات الوحيشـة = اللي تطوى في شجرها الحنافيـش
أخير من ضله وبعـض المعيشـة = يعافها الطيب ويفرح بهـا الديـش
وقال المثل مامن ورى طلع بيشـة = عيشة وراس الضبي ما به عراميش